來到仁川場地單車場，港人可以好自豪咁講：我哋香港個場靚過佢啦！在仁川差不多一星期，跑咗幾個場，呢屆亞運畀到我唔少難得經驗，總結來說如果仁川咁都辦得亞運會，用番當年申亞句口號：「香港一定得」啦！
小弟咁講並非彈仁川賽會辦得差，所謂各處鄉村各處例，明白到南韓成日驚畀北韓打，搞到當地有啲人好神經質、情緒緊張、焦慮、大喊大笑、思覺失調……好似現場保安咁，無疑係有啲神經緊張，但希望佢哋明白，傳媒係嚟採訪嘅，唔係嚟來搞事嘅。
傳媒行家怨氣重
查實每屆大賽都有聽聞傳媒同保安發生摩擦嘅不愉快事件，記得某一屆奧運甚至發生過由於接駁巴士脫班嚴重，搞到傳媒火都嚟埋，最後要騎劫大巴返酒店嘅爆笑事件，而今屆亞運就係日日都唔同規矩，朝令夕改到你唔識點形容，好多行家都好大怨氣，我真係擔心遲早「有事發生」。
睇番香港，興建6萬人主場館、「九公」游泳館、單車場，仲有各式各樣新奇有趣場館，再加埋港人待客之道全亞洲數一數二，所以香港搞亞運絕不是夢。
馬田＠仁川