渡海濠情：想着愛人即時提神

據加拿大嘅專家指出，當你想住愛人嘅時候會刺激皮質醇分泌，血液內嘅葡萄糖水平會上升，令人精神一振，因此有提神效果，嚟自大富豪桑拿嘅思思就話：「腎上腺素都會上升o架！」所以話精神不振時不妨想想自己嘅愛人，做乜效果都會好啲，咁係做乜呢？你明嘅。

刺激腎上腺素表現出色

思思話：「我啲男朋友只要一出外幾日，佢哋就會話好掛住我，起初以為佢哋吹水，但見佢哋一返嚟，就對我熱情到不得了，我至知道佢哋冇講大話，至於想住我期間有冇提神效果？據佢哋講，為咗返嚟見我，平時做兩三日至做得完嘅工作，佢哋可以一口氣做完，快平時一倍以上，而且為咗快啲返嚟見我，佢哋行程幾辛苦都唔怕，而且好多時都會興奮到瞓唔着，真係服咗佢哋，最重要係一返嚟見到我，就會對我十分熱情，而且表現十分出色，每次都令我驚喜不斷，起初以為呢啲叫做『小別勝新婚』，但睇過呢篇新聞後發現，係因為佢哋諗住我時，刺激到皮質醇嘅分泌，令血液葡萄糖含量上升，照我估計連腎上腺素都刺激埋，如果唔係，點會喺床上表現得咁出色呢？」

見唔想見嘅人狀態全無

咁諗住啲唔想見嘅人，又會唔會有反效果呢？思思話：「當然有啦！一啲唔想見到嘅人，突然話要見面，真係乜嘢精神都冇晒，好似有對情侶朋友，男嘅樣衰又乞人憎，女嘅口臭又品味差，但我男朋友就當佢哋係好朋友，一個月最少都會見兩三次面，每次要見佢哋，由出門口到現場，我都會無晒精神，佢哋一見我咁嘅樣都會問我做乜？我次次都話自己有啲唔舒服，每餐飯都背脊骨落呀！最慘係同佢哋食完飯返到屋企，無嚟精神嘅情況係仍然延續，男朋友就算使出渾身解數，但我都係無嚟性趣，就算勉強進行，都係一啲反應都冇，所以唔想見嘅人真係唔好去見。男朋友之後怕咗我，佢要見呢對朋友時唔會帶埋我去，因為佢都唔想回家親熱時我完全唔喺狀態吖嘛！」