仁川亞運其中一項重頭戲，就係「孫朴對決」，收到上頭柯打要去捕捉孫楊，目的地就係仁川朴泰桓游泳館，咁大壇嘢，真係明益小弟。
早前講過游泳項目屬於高需求賽事，但今日已經唔同晒，變成所有項目決賽都係高需求，因此孫朴對決的高需求又變成好普通一回事。人嘅心態係咁，當個個冇，而你有，自然馨香，但當個個都係咁，你就變成路人甲喇。
孫朴對決講到幾緊張，踩入泳館睇練水，只係覺得個泳池細細，同「九公」差唔多，但就以「朴泰桓」呢位偉大泳手冠名，係咪會貶低個泳手呢？所以有時覺得南韓人都幾幽默，你以為係苦情戲，其實係笑片都唔定，例如咩天國咩眼淚的韓劇，個個睇到一殼眼淚，但小弟硬係就係想笑，真係sor。
講番亞運場館件事，游泳館容量少已經錯，單車、壁球又係袖珍場地，搞到個個項目都高需求，學零零發話齋：成村人燒一隻雞翼，係咁上下啦！
馬田＠仁川