採訪「孫朴決」難過中三T
仁川亞運，又被稱為「末代亞運」。因為過埋今屆，下屆亞運將有重大變革，究竟點改革，據聞班大粒佬將於日內開會決定，但無論變成點，小弟身處亞運大改革呢個大時代，親身參與仁川亞運採訪工作，借用桂神金句：真係有今生，冇來世。
新聞中心公布，今屆亞運有三項賽事屬於高需求項目，入場採訪要抽籤分配，分別係游泳、藝術體操同棒球，換個角度睇，即係話其他項目只係中至低需求。游泳比賽有孫楊與朴泰恒對決，相當矚目，但搞到要抽籤係因為場館只得3,000幾個位，抽採訪門票難過中三T，至於有「藝體精靈」孫延在壓陣嘅藝術體操，以及棒球都係南韓熱門項目，只屬於當地人的「高需求」，唔關其他人事。
港隊對阿富汗「空蕩蕩」
至於其他項目嘅人氣唔算高，例如男足香港對阿富汗，現場所見場面比港超聯前身港甲更不堪，成個場「空洞派」，人影都冇，主辦單位亦唔會派飛充撐場面，由得佢照踢，賽事關注度下降，難怪要大改革。
其實任何體育賽事都需要現場觀眾支持，仁川亞運即將開幕，小弟希望呢屆「末代亞運」場面好好睇睇，用番董驃叔名句：「今日呢度水靜鵝飛，到有比賽就人山人海喇！」
馬田＠仁川