晶叻大哥齊捧德國
今屆世界盃日日喺東網《叻人講波》節目，透過電話同大家講波嘅晶哥王晶同叻哥陳百祥，去到冠軍戰口徑一致齊撐德國，兩位大哥都認為德國可以喺90分鐘內贏波捧盃添，今屆佢哋畀貼士一直保持極高命中率，大家刨波前梗要聽聽佢哋分析啦。
王晶其實係足球迷，過去多套電影作品都不經意插入世界盃或歐國盃比賽畫面，今屆賽事晶哥更抽空為大家講波，並深入分析阿根廷防線上的弱點：「雖然阿根廷打入決賽，但表現好普通，對住只打一個洛賓嘅荷蘭都打得好辛苦，面對德國水銀瀉地攻勢，後防馬斯真蘭奴將無法抵擋，而迪米捷利斯轉身慢嘅弱點亦會暴露出嚟，我相信德國可以喺90分鐘內贏波，成為今屆世盃最後王者。」
叻哥：德國晉級盡顯霸氣
至於叻哥已飛赴巴西在翡翠台為香港觀眾作現場評述，拍檔仲有譚詠麟同李克勤，佢話：「未踢決賽，德國王者之風已經喺準決賽大炒巴西一役顯露出嚟，從未有球隊可以在世盃準決賽贏對手7個1皮，呢場勝仗亦夠晒霸氣，今晚對住同樣嚟自南美洲嘅阿根廷，唔使諗要上盤啦！」想聽兩位大哥點樣分析決賽，上on.cc東網就有得聽喇。