德國重賞爭冠軍﹗德國足總深明「重賞之下必有勇夫」呢個道理，尋日宣布掟多破紀錄嘅690萬歐元出嚟，只要德國聽晚決賽砌低阿根廷奪冠，每位球員就可以袋多30萬歐元獎金！唔單止派錢，足總仲落實喺柏林勃蘭登堡搞個大型慶祝活動，等大軍凱旋回歸，睇嚟對4奪世盃胸有成竹喎！
其實德國喺殺入決賽後，每位國腳已經穩袋15萬歐元（約158萬港元）獎金，德國足總主席尼斯巴赫尋日宣布，冠軍獎金會Double上，一旦捧盃就向每名球員派發破紀錄嘅30萬歐元（約316萬港元）獎金。查實德國足總咁豪爽又唔係冇原因嘅，畢竟由國際足協（FIFA）派發嘅世盃冠軍獎金高達2,571萬歐元（約2.7億港元），就連亞軍都有1,830萬歐元（約1.9億港元），區區嗰690萬歐元獎金（約7,279萬港元）簡直係濕濕碎啦！
另外，德國國家隊將會喺當地時間15日上晝「返屋企」，足總已經Plan定喺法蘭克福同柏林搞兩壇奪冠慶祝活動，國家隊總經理比亞荷夫話「一定搞得成」，而德國總理默克爾、拜仁體育總監森馬都話德國「好大機會奪冠」，真係信心爆棚呀！
德國班球員同樣咁有信心，《圖片報》話主帥勒夫喺決賽前夕比之前更嚴，制訂禁酒、禁慾同禁球員受訪3大規條，啱啱以16球成為世盃No.1射手嘅高路斯本身滴酒不沾，但佢已經決定捧盃後破戒飲酒，仲話：「到時你哋會見到我變身派對動物！」
有獎金、有信心，當然唔少得氣勢，決賽當日，位於柏林嘅勃蘭登堡會將球迷區擴大4.8萬平方米，預計會有10萬球迷到場睇住大電視，為「日耳曼兵團」打氣！