華布拿化身拿破崙

法國16強對尼日利亞全場佔上風，保羅普巴凌空抽射，被安耶馬神勇撲出，賓施馬起腳又被對手救空門，仲有卡比耶勁射中楣。以為法國咁黑仔要加時，華布拿挺身而出，79分鐘開出急勁角球，令安耶馬甩手，由保羅普巴頂入，補時階段呢位「小巨人」傳中搞到尤保擺烏龍，為法國奠定勝局。

同角球旗一樣高惹嘲諷

華布拿兩次美妙「助攻」，固然搶眼，但最引人注目係佢矮小嘅身形，其中一次準備開角球時，驟眼睇呢位右翼同1.5米嘅角球旗一樣高，令人忍俊不禁，國際足協官網顯示佢有1米66，似有報大數之嫌。呢一幕隨即成為「神圖」喺網上瘋傳，對於佢能夠抗衡高大對手，嘖嘖稱奇。雖然華布拿好細粒，但速度快、腳法好，傳送功夫到家，佢負責主理嘅死球，往往能造成威脅，名副其實短小精幹。

殺敗非洲兵例入決賽

由於華布拿太矮小，過往經常成為被取笑對象，上年法國同比利時踢熱身賽，傳媒特別聚焦佢被兩位大漢費蘭尼及高柏尼包圍一幕，指華布拿僅為對手一半尺碼，亦笑稱佢只係法國「吉祥物」。華布拿今仗的確為法國帶來吉兆，球隊之前僅兩次喺世盃贏過非洲球隊，分別係98年大勝南非3比0，以及06年2比0擊敗多哥，兩屆都進身決賽，今次贏尼日利亞，莫非又歷史重演？難怪總統奧朗德睇直播時，興奮振臂高呼。

華布拿

位置：中場/右翼

身高：1米66

國際賽上陣/入球：37次/6球

年齡：29

球會：馬賽

國籍：法國