日本知衰即時大改革

首兩場世盃分組賽只得1和1負嘅日本，昨仗表現繼續令人失望，開波17分鐘就輸12碼被哥倫比亞中場古達度攻破大門。雖然岡崎慎司完半場前一度將比數扳平，奈何積臣馬天尼斯換邊後兩度建功，加上占士洛迪古斯完場前埋齋，日本最終輸夠1比4喺分組3戰只得1分恥辱出局。

2億日圓斟艾古爾領軍

一眾失望嘅球員被問到4年後嘅世盃會點時，靚仔右閘內田篤人就暗示會退出國家隊：「嚟緊嘅課題、目標同夢想都要留畀下一代。」而王牌本田圭佑賽後受訪時更幾乎「講不出聲」，但就否認退出國家隊，更承諾會捲土重來：「作為失敗者，真係冇咩好講，對唔住大家。4年後，我一定會再戰世盃。」

本田圭佑（右）今仗搏到盡，惜仍無法扭轉敗局。（法新社圖片）

前鋒大久保嘉人輸波後呆坐，久久未能平復。（Getty Images圖片）

日本喺世盃失利後將重新上路，為2018年俄羅斯世盃作準備。其實喺對哥倫比亞前，日本足總專務理事原博實已經知會沙哲朗尼將唔會同佢續約，消息指日本足總已經同墨西哥籍教頭艾古爾展開談判，出到2億日圓年薪邀請呢位前愛斯賓奴主帥接掌。艾古爾曾帶領墨西哥殺入2002及2010年世盃16強，領軍功力備受肯定。最重要係這位55歲教頭嘅進攻足球理念同日本好啱嘴形，所以日本足總已經鎖定呢位接任人選。

沙哲朗尼（左）不獲續約。（美聯社圖片）

對戰統計

「加長版」集訓迎亞洲盃

日本足總亦已落實喺9月1日開始集訓，為2015年1月9日展開嘅亞洲盃備戰並力求衞冕。日本大軍將會喺9月5日（札幌）及9日（橫濱）進行兩場麒麟盃挑戰賽，集訓9日咁長真係前所未有，主要原因相信係想畀足夠時間「新監督」艾古爾去了解球員。