黃金狂牛淒涼落幕

上屆盟主西班牙頭兩仗輸晒早早出局，即傳出幾名「黃金一代」卡斯拿斯、沙維、沙比阿朗素、費蘭度托利斯及韋拿，踢埋今仗對澳洲便告別國家隊嘅消息，後三者獲得正選上陣，上半場韋拿以靚後踭建功先開紀錄，其後費蘭度托利斯及桑馬達錦上添花，最終以3比0輕取澳洲攞番個尾彩。

卡斯拿斯沙維坐足全場

「狂牛兵團」內亂嘅最大受害者，相信都係話過想喺國家隊踢到55歲、但無奈決定喺世盃後退出嘅韋拿喇！貴為該國歷來最佳射手，韋拿只係踢咗56分鐘就被主帥迪保斯基換出，搞到佢頭耷耷勁落寞，返到後備席嗰陣仲忍唔住爆喊，認真淒涼，有唔少球迷都睇唔過眼，紛紛喺社交網爆鬧迪帥，點知賽後迪保斯基竟然話：「我唔知今場係韋拿最後一戰喎！」至於隊長卡斯拿斯同另一老將沙維成場波坐冷板，難怪迪帥被痛罵冷酷無情喇！

韋拿（右）一記後抽靚波為西班牙先開紀錄。（美聯社圖片）

飛砵惹混亂 卡斯拿斯賽後走去場邊感謝球迷捧場，仲將波砵飛上看台，引發一場爭奪戰，要勞煩保安介入先平息事件。（美聯社圖片）

回國航機遭雷電狂劈

眼見呢支昔日冠軍依家成盤散沙咁都唔知衰，忠臣義士個個淒涼落幕，搞到連個天都嬲埋，結果佢哋飛返西班牙嘅專機，喺接近降落馬德里巴拉克斯機場嗰陣，右邊機翼遭雷電狂劈發出爆炸巨響，雖然未有影響機上乘客，但機上嘅記者都忍唔住話：「隊波就嚟畀雷劈散喇！」

法比加斯（黑衫）掛住轉會搵真錢，喺今屆3戰都幾乎「隱形」。（Getty Images圖片）

對戰統計

韋拿

年齡︰32

位置︰前鋒

出場次數︰97

入球︰59