2014溫布頓網球賽已揭開戰幔，白俄羅斯前「一姐」艾珊妮嘉首輪輕鬆贏波，但佢都不忘關注正在火熱進行嘅世盃。艾珊妮嘉無法支持祖國嘅球隊，因此佢選擇支持阿根廷，因為喺佢眼中「細細粒」嘅美斯好可愛！
因為白俄羅斯未能打入世盃決賽周，所以艾珊妮嘉冇辦法幫祖國球隊打氣，結果阿根廷就成為佢支持嘅球隊：「喺過去3屆世界盃，我都係阿根廷嘅支持者，我仲曾經着住阿根廷波衫影相添！」
令艾珊妮嘉成為阿根廷「粉絲」嘅主要原因就係美斯：「我認為美斯係世界上最好嘅球員之一。」原來除咗球技，身高都係艾珊妮嘉情迷美斯嘅另一個原因：「佢好細粒好可愛，總之就好得意啦！」唔知道1米69嘅美斯聽到1米83嘅艾珊妮嘉咁樣讚自己，會有咩感想呢？