今屆西班牙慘淡收場，與更衣室內訌不無關係，其實早喺去年洲際國家盃已經醞釀。《機密報》消息指，「狂牛兵團」喺決賽敗予巴西後，唔少球員都嫌教練團訓練方法太過「青年軍化」，其後衝突愈演愈烈，老大哥沙維更與助教荷西格蘭特爆發激烈爭執！事緣佢一早對格蘭特嘅工作方法極為不滿，加埋呢位助教曾向傳媒暗示沙維自視過高唔肯同沙比阿朗素合作，自然成為沙維眼中釘，亦都令佢心灰意冷決定退出國家隊。
另外，《機密報》仲話西班牙早前喺美國備戰世盃時，陣中「大牌」球星個個都自私精上身，好似碧基就獲准同女友夏奇拉一齊住，不過佢居然得寸進尺，連飯都唔同隊友食掛住陪女友行街；法比加斯更公然違規去接受車路士體測，仲喺賽前一日宣布轉會，迪帥梗係激到紮紮跳啦，不過法比仔並冇反省，對澳洲前嘅操練仲同迪帥吵大鑊。
更誇張嘅係，佐迪艾巴對澳洲賽後，居然將對內訌嘅不滿發洩喺一位疑似「洩密者」嘅記者身上，英國《衞報》大爆艾巴當時衝向《阿斯報》記者馬達耶拿斯大鬧：「下次我一定擰甩你個頭呀！」成班波咁多自私精，搞到一盤散沙，難怪踢得咁曳喇。