跆拳美女初上泰拳擂台
睇波睇到滯滯哋，要搵啲其他運動調劑吓，高手雲集的擂台大戰The One Legend泰拳賽，將於6月24日假九龍灣展貿中心Star Hall上演，重頭戲泰國、巴西、白俄羅斯、香港四大拳王，好似賀歲波咁進行四角賽，仲有跆拳道美女陳鈺芸JuJu初戰泰拳擂台，以及新星郭海寧阿Ling挑戰意大利拳后，總之打得又睇得。
全美華埠小姐出身
靚女陳鈺芸4月代表香港隊贏得跆拳道亞洲賽銅牌，而她實際上係一名打星，09年全美華埠小姐出身，仲係碩士，JuJu今場對手係薛璵菲，進行46公斤賽事，JuJu走嚟打泰拳擂台係想挑戰自己：「我知泰拳唔係講玩，上得擂台就要搏盡，但我唔怕畀人打臉，有信心可以取勝。」
同晚另一場女子賽，由香港新星郭海寧迎戰意大利拳后Jalma Klinmee（51公斤），阿Ling師傅是香港泰拳名將「風之子」杜恆霖，她說會全力一拚：「對手Jalma的老公，正是泰拳拳王蕭殺狂，來頭唔嘢小！」
賽事由一代拳王陳文義主辦，請來泰國拳王中華豹、巴西拳王Jeferson Vuplelgor、白俄羅斯拳王Klimovich及香港拳王吳景聰打四角賽，爭奪世界拳王腰帶，另外黃秉基以52高齡再上擂台，亦轟動拳壇。