謝拉特黑到你唔信

對車路士後又再甩轆

謝拉特，呢位「神奇隊長」、世界最佳中場之一，喺一次又一次拯救球隊嘅同時，亦試過多次甩轆，犯下大錯累球隊輸波，最近期、亦最印象深刻嘅一次「傑作」當然就係利物浦對車路士一戰出現「世紀跣腳」，跣走咗個英超冠軍。

今場「烏英大戰」，邊隊輸波就邊隊9成9會出局，結果個天又一次跟謝拉特開玩笑，賽前獲一對囡囡着英軍波衫打氣、老婆卡倫送上祝福嘅「謝四」有家人力撐都無法扭轉惡運，喺85分鐘同烏拉圭前鋒卡雲尼爭頂，點知頂咗畀後面嘅球會隊友阿蘇，阿蘇一個唔該單刀射入第2球，以2比1擊敗英格蘭。

「送禮特」唔認衰反責隊友幼稚

成為輸波罪人嘅謝拉特賽後紛紛畀網民喪寸，話佢係「送禮特」，成日送禮交助攻畀對手，又叫佢認命，一兩次係冇運，經常係咁就有問題，當然唔少得改圖寸佢喇！不過呢位「悲情主角」賽後唔肯認衰，反而炮轟隊友太幼稚，輸晒經驗，畀晒機會阿蘇。的確，若然後防跟貼啲阿蘇，佢都唔會咁易單刀射入喇！

謝拉特甩轆事件簿

2004年歐洲國家盃，英格蘭喺分組賽首場對法國，謝拉特「自殺式回傳」畀法國前鋒亨利單刀博到12碼，法國最終贏2比1。

2006年英超，謝拉特又再一次回傳畀亨利，令亨利入波助阿仙奴贏利物浦2比1。

2010年英超，謝拉特喺聯賽最後階段「幫」車路士贏得冠軍，回傳畀門將連拿乏力，畀杜奧巴建功先開紀錄，最尾車仔贏2比0。

2014年4月，利物浦對車路士只要唔輸就好大機會贏英超，結果謝拉特跣腳甩波，益晒車仔嘅丹巴巴亞單刀破網，紅軍最終輸0比2，未能首奪英超。