喀麥隆癲佬正傳醜陋出局
世界盃癲佬橫行，敵我不分攪亂檔！繼葡萄牙「殺人狂」比比累死葡萄牙後，昨晨A組喀麥隆亦上演武打內訌鬧劇，桑治「家族遺傳病發」失常批(月爭)打對手文迪蘇傑，直接攞紅牌被逐，導致球隊全面崩潰大敗。兩位「豬一般隊友」伊高圖、莫簡祖更於比賽途中公然開拖，醜態盡出。「非洲雄獅」最終慘吞克羅地亞4蛋，兩戰皆敗羞家出局，都算癲爆全球。
喀麥隆11分鐘已被奧歷射破大門，最攞命係上半場尾段，桑治無端端出(月爭)打冇波在腳嘅文迪蘇傑背部，結果即時被球證紅牌趕出場。「非洲雄獅」踢少一人，更加抵擋唔住對手猛攻，大敗0比4，橫跨3屆世盃6連敗，追平1966年瑞士嘅羞恥紀錄。喀麥隆輸大鑊已經夠衰，補時階段仲有守將伊高圖同前鋒莫簡祖發生口角，繼而動武，以頭槌互撼，好彩老大哥韋保及時將兩人分開，步回更衣室期間亦要隊長伊度奧勸阻，場面尷尬。
阿叔兩屆被逐 被諷「遺傳病發」
喀麥隆球員出名紀律差，桑治更係出身「紅牌家族」，阿叔尼高拔桑治喺94年世盃對巴西一役被逐，成為賽事史上最年輕紅牌球員，4年後再見紅，係首位連續兩屆世盃被逐嘅球員。桑治今場被諷係「家族遺傳病發」，佢嘅批(月爭)動作，更被網民改圖成摔角手寸爆。
其實喀麥隆今屆揭幕前亦曾因獎金問題同足總鬧翻，完全係一隊「僱傭兵」。伊高圖同莫簡祖講手，正好反映各人只顧自己利益。賽後，領隊芬克鬧爆：「真係難以想像，我需要時間搵佢哋爭拗原因。老實講，呢種事完全破壞喀麥隆形象。」喀麥隆輸波又輸人，恐怕芬克帥位亦坐唔穩，唔使去解決呢個死症。