克羅地亞大勝掃走裸照風波！「格仔兵團」今場有頭號射手文迪蘇傑解禁復出，即省入兩粒幫球隊贈送喀麥隆4隻光蛋，將早前「春光乍洩」嘅陰影一掃而空，拿傑迪錫可能仲因為咁索性大解放，賽後竟然同喀麥隆嘅麥比亞交換波褲，超級Sexy！
克羅地亞近期麻煩事多多，分組賽第一場對巴西就因問題12碼而反輸，跟住又發生裸照風波，班球員喺酒店泳池游水畀記者影全相，主帥尼高高華更決定球隊對傳媒封嘴，好在球員今場冇受影響，再加上有前鋒文迪蘇傑刑滿復出，呢位坦克型鋒霸猛虎出閘，即轟入兩粒幫球隊大勝，更當選埋今場最佳球員。
大勝過後，一班「格仔兵」暫時忘卻裸照事件，唔知係咪已經「放開懷抱」，中場拿傑迪錫竟然同前西維爾隊友麥比亞交換波褲，仲要係喺球員通道上當住大批記者同職員面前除剩「底底」，Sexy得嚟又夠搞鬼。