舒麥加女總理帶旺德國

在尋日凌晨德國對葡萄牙開波前夕，因滑雪意外昏迷多月嘅前世界一級方程式賽車冠軍舒麥加奇迹甦醒，雖然仍未能講嘢，只能用眼睛同老婆交流，但呢位德國「車神」醒番嘅消息，無疑振奮起「日耳曼兵團」嘅士氣，前鋒普多斯基賽前揚言要贏得世盃獻畀舒麥加。德國在對手中堅比比被逐下，憑湯馬士梅拿大演帽子戲法，加上曉姆斯頭槌建功，以4比0大勝葡萄牙，在G組首場旗開得勝，亦延續德國女總理默克爾入場打氣未嘗一敗嘅紀錄。

場均1.14球效率超「轟炸機」

上屆以年20歲之齡榮膺神射手嘅湯馬士梅拿，今仗喺「裝假9」馬里奧葛斯掩護下，只曾4次射門就造成3個入球，包括先開紀錄嘅12碼，唔單止成為今屆首位連中三元嘅球員，亦係德國歷史上第6位於決賽周單場入3粒嘅球員，連同上屆5個士哥，湯馬士梅拿於世盃7場入8球，場均入1.14球，比前輩「轟炸機」梅拿嘅場均1.08球效率更高。最令人驚奇係從數據顯示，湯馬士梅拿喺兩屆世盃嘅中框埋門只得9次，咁就入咗8粒，證明佢臨門一腳把握力超強，例不虛發。

2.7倍神射手有買趁早

湯馬士梅拿現時位居射手榜一哥，連帶令其神射手賠率熱爆燈，馬會足智彩只得2.7倍。環顧世盃歷史，從來未有球員能夠冧莊金靴獎，無論係梅拿、連尼加、朗拿度甚至隊友高路斯等頂級殺手都未能做到，不過湯馬士梅拿首仗就入3粒，難怪佢話想試下蟬聯金靴獎滋味喇。