鄧肯自爆只用一隻半腳打波
NBA總決賽進行得如火如荼，馬刺「長青樹」鄧肯（Tim Duncan）日前接受官網訪問時，證實自己其中一隻腳已經不太方便，只能用一隻半腳打波。不過，鄧肯近年表現出色，有種「返老還童」的感覺，佢透露原因係自己努力訓練，與及主帥普波維治（Gregg Popovich）對其的保護；至於總場數雖被熱火追成1比1，但鄧肯表示球隊仍然信心十足可以奪冠。
韋迪「插水」被聯盟罰款
馬刺主帥普波維治過去曾向媒體表示，鄧肯因為膝蓋的傷勢有一隻腳不能完全伸直，只能用一隻腳打波。而鄧肯昨日接受訪問時證實普帥所言非虛：「我自己只係剩番一隻半腳打波，依家必須重新學打籃球，唔能夠好似以前咁單打獨鬥，好多時都係幫隊友製造機會。我訓練嘅唯一動力係如果唔進行訓練，就唔可以贏到比賽，主帥普波維治咁多年嚟做咗好多保護我嘅決定，去延續我嘅職業生涯，我同佢唔止係主帥同球員嘅關係，一旦建立咗信任同尊重，所有嘢都可以解決。」
馬刺日前雖被熱火擊敗，總場數被扳成1比1，但鄧肯就話球隊依然信心十足可以勝出賽事贏得總冠軍。而熱火主將韋迪（Dwyane Wade）於總決賽Game2面對馬刺後衞真路比利（Manu Ginobili）防守時做出過於誇張的動作，被聯盟判為「插水」罰款5,000美元（約38,757港元），「閃電俠」同時已經係今年季後賽第5位因「插水」而被罰的球員。