傅家俊世盃花心男
香港「桌球天王」傅家俊（Marco）一直是巴西忠心fans，佢喺父親引領下踏上桌球之路，但一夥足球心則是由一位Uncle薰陶下成長。Marco自爆最愛森巴足球，86年世盃巴西對法國經典一役令佢畢生難忘，然而Marco認為愛隊今屆縱有主場之利，不過壓力更大，加上陣中缺少「球王」在陣，捧盃有難度，反而睇好阿根廷今屆可以捧盃：「就算美斯態沉，都仲有迪馬利亞。」
細細個已開始睇波嘅傅家俊，坦言較為「花心」，不同階段喜歡不同球隊，唯獨對巴西嘅愛細水長流：「捧英格蘭因為有情意結，鍾意荷蘭全因昔日有古列治、雲巴士頓同列卡特嘅三劍俠，至於巴西就係永遠。爹哋愛踢波，小時候已經從佢口中認識到森巴球隊有幾勁！1986年，我8歲第一次睇世界盃，印象好深刻，晚晚都要爹哋叫醒起身睇波，當年8強巴西對法國係歷來最正嘅一場世盃賽事，三大巨星柏天尼、蘇古迪斯及薛高先後射失12碼嘅戲劇元素，經典到可以講到今時今日。」
美斯唔弗仲有迪馬利亞
今屆世盃，Marco表示自己嘅Dream Final係巴西對英格蘭，但返回現實就預測由阿根廷、德國爭標：「巴西整體實力不及以前，尼馬亦未去到『3R』級數，主場出戰冇壓力就假，小組出線冇問題，但去到淘汰賽就好難講！不過，我依然覺得南美球隊喺自己地頭較為着數，其中以阿根廷最有冠軍相，美斯近期狀態確實一般，但迪馬利亞超弗，佢喺歐聯決賽踢到曉飛，加埋希古恩、阿古路等，中前場殺晒啦！」
下周北上展開新球季的傅家俊，打完PTC及無錫精英賽後便會回港，直至8月才舉家返英國，他笑說可以暫時放下一切壓力，盡情感受世盃熱浪！