馬拉簡拿球場爛櫈嚇人
【蘇豪巴西直擊】話咁快就去到今次世盃之旅最重要嘅一站，小記殺入巴西足球聖殿馬拉簡拿球場朝聖，賽場保留1950年開幕嘅面貌，同時加入現代化設施，新舊完美結合，呢個神級球場超有霸氣，嚟緊世盃氣氛當然好到爆，阿根廷、西班牙同法國等勁旅，都喺度踢分組賽，但賽場後備席竟然出現一張爛櫈。咦，啲櫈咁牙煙，到時跌親美斯或者費蘭度托利斯點算先？
馬拉簡拿球場將於5月22日交由國際足協接手睇場，喺世界盃舉行期間球場Tour服務會暫停，就等小記喺度同大家嚟個精華遊啦！球王比利職業生涯第1,000球喺馬拉簡拿射入，場內擺放咗當年個波同埋龍門網，當然唔少得比利腳印，隔籬仲有名將加連查銅像同腳印，兩大巨星互相輝映。另一影相熱點當然係更衣室，呢度已掛齊巴西大軍球衣，人氣王尼馬件衫堅多客仔捧場囉！
馬拉簡拿最正係球場同觀眾席距離近咗，行勻個場感覺真係好正；不過，當小記落到草地之時，後備席竟然有張爛櫈，曳啲噃！小記身形大大舊，但都冒險坐上去試一試張櫈，實驗證明仲坐得，可能真係太多人參觀個場，希望到世盃開波時唔好再有呢啲蝦碌嘢啦，否則跌親班教頭同球星真係可大可小喎！
全天候控制室保障安全
去到馬拉簡拿球場梗係要捉住場地營運總監路爾斯施華做個訪問，呢個場喺1950年開幕後最勁試過坐近廿萬人，今次因應世盃作改建，路斯爾施華話唔擔心影響氣氛：「減少座位人數係出於安全考慮，但球迷會更貼近賽場，到賽日有成七萬八千人逼爆個場，氣氛肯定冇得頂。」世界盃係國際盛事，唔少人都擔心馬拉簡拿會成為恐怖組織襲擊對象，路爾斯施華話球場控制室廿四小時有人睇實，有事要疏散球迷亦只需十零分鐘，唔擔心會有大問題。
