費特耍大牌操練壓軸登場
富明尼斯巴西射手費特順利入選國家隊，佢本周五操練時盡顯大佬風範，勁遲先肯行入球場，球隊嚟緊會於馬拉簡拿球場決戰同市大敵法林明高，小記有機會提前感受世盃賽場大戰氣氛，一個字：爽！
費特係巴西教頭史高拉利愛將，「大菲」一早講明會召佢入伍，呢位球星操練時吸引當地唔少行家採訪，當大部分球員行晒入場，佢先施施然行到，期間同班隊友有講有笑，心情似乎都幾靚。由於費特勢成巴西世盃主力，當地行家話若然球隊踢落有優勢，呢位巴打有機會於尾段抖抖。
學生Look孔卡依然好波
同場仲有前廣州恒大巨星孔卡現身獻技，呢位左腳王今年重返富明尼斯仍然備受矚目，佢着住對黑色砵，遠睇好似成對皮鞋咁，加上佢身形細細粒，唔知仲以為係學生哥，都幾搞鬼！不過，孔卡波底真係超好，有佢負責造波，前面就由費特攻堅，法林明高班後防真係要睇緊啲喇。