大菲唔禁慾玩twitter
【蘇豪巴西直擊】巴西公布世盃大軍名單後，唔少傳媒指成隊波得6個球員有世盃經驗唔多掂，但主帥史高拉利淡定回應話明會搵多位世盃名宿幫隊內世盃新丁搞個「精讀班」，又話會治軍「現代化」，以迎合年輕球員，首先佢會解除禁慾令，亦會准球員喺世盃期間自由玩twitter，果然與時並進。
昔日名將組星級導師團
史高拉利深知唔用朗拿甸奴同卡卡等球星會惹來爭議，正式公布名單前強調呢個係整個團隊深思熟慮嘅決定，最後大軍僅得6個球員有世盃經驗。「大菲」就有妙計幫助呢班世盃新丁，佢將安排巴西世盃名將輪住傳授爭冠秘技，預計卡富、鄧加同大哨等都會合組「星級導師團」。
巴西90年代名將列卡度洛查率先教路：「依家球賽速度好快，做後衞要轉數快，仲要幫手進攻。」而86年世盃隊長伊甸奴就睇好呢班後輩嘅奪冠機會，仲話主場出戰只會令球隊更有動力爭冠，唔會構成任何壓力。
體能教練話性生活重要
「大菲」02年世盃以嚴厲軍紀治軍成功捧盃，當時實行禁慾令，但佢都知管教呢班新世代球員再用呢招已經行唔通，所以都作出讓步，除咗解除禁慾令之外，仲畀球員去社交網站同球迷交流，都算係與時並進啦！
小記昨日殺去保地花高大本營去睇剛入選世盃大軍嘅巴西門神謝法臣奧利華拉，期間仲同前巴西體能教練馬菲奧斯傾過，佢都讚成不禁慾：「查實性生活對球員身心都好重要，冇乜必要忍住，最緊要唔好玩得太夜，費事第日冇精神嘛！」