巴西世盃大軍只有4名球員喺國內搵食，被視為二號門神嘅保地花高門將謝法臣奧利華拉成為傳媒焦點，佢豪言要爭取正選把關，堅有鬥心！
施薩索拉斯一向係巴西首席門將，但謝法臣人氣絕對唔弱，昨日佢入選世盃大軍後，小記撲去保地花高個場睇佢練波，在場一早都有唔少傳媒嚟到採訪。由於球會預咗佢會入選，所以特登推遲原定上月尾舉行嘅「門將節」，昨日舉行慶祝儀式，拉晒Banner撐佢，謝法臣喺現場不斷同小門神合照及簽名，有個女球迷勁激動，佢仲攬實個姐仔添！
謝法臣於記招鳴謝戰友、領隊同管理層支持，仲話好榮幸可以保地花高球員身份參戰世盃。佢喺屋企睇直播知道有份打世盃，即時同老婆擁抱。謝法臣唔認為自己係副選，強調會盡力打好球會賽事爭坐正，仲落足鞋油擦教頭史高拉利隻鞋，盛讚「大菲」可令球員發揮120%戰鬥力。 當謝法臣得知有香港傳媒到訪之時，佢勁開心咁表示：「真係好感恩同開心，多謝傳媒朋友嘅支持，歡迎嚟到巴西！」小記無意中發現自己原來同呢位巴打同年同月同日生，真係堅有緣喎！
保地花高主帥域拿文仙尼就話自己喺尼馬細個個陣教過佢踢波，當時早知佢非池中物，仲話佢已取代朗拿甸奴成為巴西嘅「Special One」，有望喺世盃大放光芒。