我依家喺澳洲珀斯啊！前日我同水球隊隊友出發，嚟呢度集訓10日，同啲高水平嘅隊伍作賽，希望偷吓師提升自己，今年大賽甚多，所以希望餘下日子不斷加緊訓練，唔好後悔！
過嚟之前畀個朋友捉咗去睇戲，話呢套戲可以幫我尋找熱血喎，所以喺冇乜準備之下睇咗《KANO》。呢套戲改編自真人真事，一支無贏過任何一局嘅棒球隊，點樣變成一支黑馬，最後贏嘅唔係冠軍，而係一份尊敬、尊重。套戲無花巧，平舖直述咁介紹一支農村棒球隊點樣一步一步走上高峰。雖然係紀錄片，不過入面真係帶出咗好多信息，尤其是如果你係運動員嘅話，一定有共鳴。
一隊波成功結合好多因素，一股熱血再加上大家嘅投入先會有第一個化學作用，再加上教練與隊員互相支持磨合先有成績。有人講過，教練係球隊靈魂，球員就係手手腳腳。當教練落柯打，隊員就要依遁去做，整隊一齊配合先可以有效果。所以戲中教練為咗幫自己，幫學生達成目標，付出百二分時間同努力，到最後贏咗自己，贏咗尊重。
我睇完之後好感激嗰位朋友，因為佢我先會睇呢套戲，先至知道自己仲有一股熱血係心裏面！係時候拎埋出黎，為夢想奮鬥喇！不要想着贏，要想不能輸！
天生運動狂，前亞運游泳香港隊「水霸王」