消失的10號

美斯隱形 亂食嘢搞到跑唔郁

「地上最強」巴塞作客以0比1不敵馬體會，兩回合計輸1比2出局，7年以來首度不入準決賽，球王美斯再次迷失於馬體會嘅兇悍防線，全場近乎隱形，未能扮演救世主角色。首回合1比1攞到個作客入球嘅馬體會，一開波就逼到巴塞有氣冇碇抖，僅5分鐘就由佐治高基射入致勝入球。

其後巴塞空有控球權，但真正入肉埋門唔多，反而阿祖安盧比斯同韋拿先後中楣中柱、韋拿兩次殺入禁區被撞跌，球證韋比都冇畀12碼，如非門將賓度勇救迪亞高、基比及基斯甸洛迪古斯嘅攻門，巴塞或遭更大敗辱，最終巴塞都要輸0比1，兩回合計1比2出局，自07年喺16強遭利物浦踢出局後，7年來首次未能殺入4強。

馬體會門將高圖爾斯（右）飛身攔下單刀闖關嘅尼馬。（美聯社圖片）	朗尼（右）紮住上陣谷極唔起，圖為與馬里奧葛斯短兵相接。（美聯社圖片）	艾拉（左）雖射入世界波，但洛賓一入球一助攻更加搶鏡。（美聯社圖片）

哥帥走後無王管

當巴塞最需要美斯拯救之時，呢位球王再次冇貨交，全場只係跑咗6,853米，只係比門將賓度跑多約1,500米，點解美斯變得咁懶呢？有指前主帥哥迪奧拿執教巴塞嗰陣，曾為美斯制訂嚴格飲食餐單，但自哥帥離隊後，之後兩任教頭維蘭路華同馬天奴都冇再督促佢，呢位王牌開始放肆，多咗食烤肉、牛肉同飲汽水，因而搞壞咗身體，從美斯今季頻頻受傷，又操唔番弗，睇嚟空穴來風，未必無因喎。

朗尼敗家 帶傷搏殺三度失機

曼聯作客1比3不敵拜仁，兩回合計輸2比4出局，王牌球星朗尼帶傷披甲浪費3次黃金餐士，成為罪人。「紅魔鬼」勢將繼95至96季度後再次缺席歐聯，主帥莫耶斯強調球隊今次只係暫別，揚言定會捲土重來。朗尼帶住腳趾傷患落場，開波8分鐘破越位成功，但卻停咗喺度「思考人生」，結果畀拜仁後衞返齊嚟瓦解攻勢，9分鐘後佢喺左路反擊搞咗好耐先傳中，令路爾斯華倫西亞越位食詐胡。

不過，最致命嘅係朗尼下半場62分鐘喺12碼點空晒「軟射」失機，當時雙方總比數踢成2比2，若果呢球入咗，形勢將完全改變。朗尼態沉敗家，莫耶斯亦唔敢換走佢，明顯驚得失呢位大將。朗尼4年前鬥拜仁又係首回合受傷，次回合帶傷上陣，最終球隊出局，今次又再歷史重演。

莫耶斯話重建順利

曼聯領隊莫耶斯賽後埋怨球員唔夠集中：「學生哥都知領先後要盡量避免失球，咁快輸番粒非常致命，我感到好失望。」曼聯難望取得來屆歐聯席位，但莫帥話仍可吸引猛將加盟：「我哋會搵到適合嘅人選重建球隊，唔關打唔打到歐聯事，我哋斟緊啲球員都好有興趣加盟曼聯。」