七欖今日開戰齊撐港隊
「國泰航空/滙豐香港國際七人欖球賽」今日爆發，門票早已經售罄，可以話係一票難求，網上討論區更出現大量放飛及收飛主題，盛傳場外黑市價三日套票由1,500元，炒高至7,000元一套，升值逾3.5倍。有票在手的球迷要早早入香港大球場霸位盡興，未有波飛的亦不用失望，今年大會於中環新海濱新設立「HK Fan Zone」，有四個大電視全程直播賽事，仲集睇波、飲食及音樂於一身，一樣能夠感受「七欖」大戰氣氛，為香港隊打氣。
一如以往，「七欖」賽事波飛搶手，網上出現不少求飛及放飛留言，單日飛同三日full set全套都有，有人留言「現金、高收大量Rugby全套及單日」，不過，炒賣門票及接貨均屬違法行為，而且隨時有機會買到假飛，兩年前便有一名英漢，涉嫌兜售用彩色雷射打印機列印出來的門票被捕，買黃牛飛毫無保障可言。
有飛在手的球迷，入場之後，當然要到「兵家必爭之地」的大鐘底南看台霸位，這裏是傳統最多Cosplay、玩得最放、最多靚女的看台，根據以往經驗，裸跑人士都會選擇在南看台「起跑」。
今年焦點仍然是幾支熱門球隊的表現，由於「滙豐世界七人欖球系列賽2014」三個分站冠軍分別由菲濟、南非及新西蘭各贏一站，香港站銀盃之爭更見重要。香港今屆則參戰有12隊的外圍賽，力爭下屆成為種子隊，「港欖」將同意大利、東薩摩亞及突尼斯同組。
中環「HK Fan Zone」現場直播
不過，未有波飛在手的球迷亦不用失望，因為大會今屆於中環新海濱設立「HK Fan Zone」，入場人士亦可以在大螢幕欣賞現場直播的賽事，「HK Fan Zone」還有音樂及樂隊表演，加上開胃小食及啤酒，包保你一樣咁過癮。
另外香港女子隊同日則會出爭假港會場上演的「香港女子七人欖球賽」。香港女子隊今次賽事以老帶新，除經驗豐富的隊長陳朗詩在陣外，欖總「青訓產品」90後美少女袁樂宜，則首度入選出戰該大賽。
HK Sevens小資料
比賽日期:2014年3月28日至30日
場地：香港大球場
參賽球隊：28隊
（包括16支種子隊，以及12支外圍賽球隊）
賽事數目：共70場(男子賽事)
總獎金：15萬美元
上屆錦標得主:(銀盃)斐濟、(銀碟)薩摩亞、(銀碗)英格蘭、(銀盾)法國
註：3日賽事於大球場的門票全部售罄，今年設有HK Fan Zone於中環新海濱舉行，設有大螢幕直播「七欖」賽事，同場有音樂會等活動，詳情可瀏覽www.hkfanzone.com查詢及購票
周五焦點賽程
2:44pm 香港Vs突尼斯
4:56pm 香港Vs東薩摩亞
6:24pm 美國Vs薩摩亞
6:46pm 加拿大Vs葡萄牙
7:08pm 澳洲Vs西班牙
7:30pm 肯尼亞Vs斯里蘭卡
8:20pm 新西蘭Vs蘇格蘭
8:42pm 英格蘭Vs阿根廷
9:04pm 南非Vs法國
9:26pm 斐濟Vs威爾斯
香港女子隊賽程（港會場）
8:30am 加拿大Vs香港
9:50am 哈薩克Vs香港
*預計於9:42pm完成全日賽事
**另設女子七欖銀盃決賽於7:52pm舉行