西岸「一哥」馬刺上周六作客勇士，全隊入住柏克萊市一間著名「鬧鬼酒店」Claremont Hotel時，真係遇到靈異事件。馬刺「大後備」阿耶斯（Jeff Ayres）首先遇到房間門匙失靈，之後又聽到BB嘈吵聲，以為酒店「擺烏龍」將已有住客嘅房門匙畀佢，點知間房原來乜人都冇；甚至連馬刺主將鄧肯（Tim Duncan）亦有類似的撞鬼經歷，更聲言拒絕再入住該間酒店！
阿耶斯憶述入住「鬧鬼酒店」的恐怖經歷時仍猶有餘悸：「我行去自己間房嗰陣，喺走廊已經聽到有啲聲喺房入面傳出嚟。我以為有人開咗電視，之後諗住開門，點知條匙唔係好Work，仲好似有啲BB嘅叫喊聲傳出嚟。我當時心諗『咩料呀』，咪返落去同酒店職員講囉，點知佢哋話打電話上去冇人聽，仲話間房應該係冇人，會叫保安同我一齊上去。酒店職員之後同我講話換房，不過都搞到我勁驚！」
事實上，遇上怪事嘅唔只阿耶斯一個，就連見慣世面嘅鄧肯亦有類似經歷，更明言唔想再入住Claremont Hotel：「我都聽到阿耶斯間房有BB叫聲，仲聽到走廊出面有跑來跑去聲音。我以前都聽過呢間酒店嘅鬼古，聽完咪得啖笑囉，但經過今次之後真係唔想再喺呢度過夜！」其實，大多數聯盟球隊造訪勇士時，都會選擇入住三藩市的四季酒店，對這間「鬧鬼酒店」都會敬而遠之。馬刺下次再作客勇士時，睇嚟最好搵定其他酒店。