高比「下海」先推運動飲品
因傷患而要提早收「咧」的湖人巨星高比拜仁（Kobe Bryant）從商誓成新一代商業大亨，昨日宣布成立Kobe Inc.（高比股份有限公司），並已經與運動飲品公司開始合作大計。不過，「小飛俠」聲稱開公司並非因為自己職業生涯已到黃昏，而是在家「煲劇煲到悶」，要「搵嘢做」充實生活！
高比拜仁昨日接受《ESPN》訪問時稱一直有意從商：「我由2002年開始已經有咁嘅構思，但嗰時冇確實去做，依家因為受傷所以多咗時間喺屋企。不過，煲劇煲得多都會悶，而且另一個問題係除咗睇劇外，我仲可以做啲咩呢？」35歲的高比拜仁自稱從成功轉型的兩大名宿「波神」米高佐敦（Michael Jordan）及「魔術手」莊遜（Earvin Johnson）身上得到啟發，將會從運動飲品入手，創立自己商業王國。
高比亦在訪問中自爆，近日與湖人總監占美巴斯（Jimmy Buss）見過面，同時指今次會面十分重要：「占美同我嘅對話好重要，一嚟湖人係佢哋家族生意。而我由17歲起一直効力湖人，都好想見到球隊得到成功，今次對話最重要係大家得到共識。」「小飛俠」明言自己想再次衝擊總冠軍，才會與占美巴斯表達希望球隊可以在下季反彈的意願。而湖人昨日主場迎戰魔術，憑佐敦希爾（Jordan Hill）攻入全場最高28分，以103比94擊敗對手。
NCAA又爆冷堪大出局
另外，NCAA再現爆冷賽果，NBA準狀元韋堅斯（Andrew Wiggins）只有4分進帳，其所屬的堪薩斯大學最終以57比60不敵史丹福大學緣盡16強。