曼聯難過猛「仁」關

今屆歐聯大使費高一手將曼聯送入「仁」口！（Getty Images圖片）

巴塞馬體會「西班牙內訌」

曼聯喺16強次回合，憑尹佩斯連中三元反勝奧林比亞高斯驚險晉級，賽後主帥莫耶斯開心到癲，仲好大口氣話紅魔有實力稱霸。言猶在耳，尋晚喺瑞士尼翁嘅歐洲足協總部進行8強抽籤儀式，紅魔卻抽到下下籤，要硬撼德國班霸兼衞冕嘅拜仁，後者喺西班牙名帥哥迪奧拿率領下如日方中，4年前拜仁亦曾喺半準決賽淘汰曼聯，曼聯依家奪冠賠率冷到25倍成為大冷門，莫耶斯惟有望班波獲得99年決賽補時入兩粒反勝拜仁嘅超好運氣。

有球王美斯壓陣嘅巴塞，要同「床單兵團」馬體會上演西班牙內訌，今季巴塞喺西超盃及聯賽三鬥馬體會全部打和，冇乜甜頭，畀巴塞逼走嘅「床單兵團」前鋒韋拿誓要搵舊東家出氣。另一西甲勁旅皇馬雖然再遇剋星「蜜蜂兵團」多蒙特，但上屆喺4強首回合食出大四喜擊敗皇馬嘅「蜜蜂兵團」箭頭羅拔利雲度夫斯基因儲夠牌喺8強首回合坐波監，「銀河艦隊」可趁機復仇。

歐聯8強對賽

歐霸盃8強對賽

PSG懸賞每人1,070萬爭標

至於車路士就要火併恨捧歐聯恨到發燒嘅法甲一哥巴黎聖日耳門（PSG），PSG為咗激勵眾將嘅求勝欲，法國傳媒大爆佢哋高層特登搵埋王牌伊巴謙莫域密斟，決定若果PSG能夠喺今屆歐聯封王，每名球員會獲得100萬歐元（約1,070萬港元）獎金，打破上屆盟主拜仁嘅80萬歐元（約857萬港元）最高紀錄。

歐霸盃8強亦喺尋晚抽籤，熱刺被賓菲加淘汰後，英超球隊全軍覆沒，但仍然不乏好戲碼，意甲班霸祖雲達斯將會硬撼法甲勁旅里昂。上屆亞軍賓菲加抽到好籤，對手只係荷甲球隊阿爾克馬爾。華倫西亞、西維爾成功避開對方，令西甲球隊有望爭奪4強半壁江山。