勒邦占士（LeBron James）喺剛結束嘅NBA全明星賽雖然表現麻麻，但佢應該都開心到爆，事關老婆莎雲娜（Savannah Brinson）又有喜，而且今次仲好大機會生女添！同時，《福布斯》雜誌公布咗NBA球星代言費排行榜前10位，勒邦占士力壓高比拜仁（Kobe Bryant）高踞榜首，「大帝」今趟真係雙喜臨門。
美國八卦媒體報道，勒邦占士老婆莎雲娜將迎來第三個小朋友，「大帝」一直希望係女。勒邦占士上月喺社交網上傳同保殊（Chris Bosh）囡囡嘅合照，同時透露自己想要個女嘅願望：「保殊有個囡囡真令人嫉妒，天呀，我真係想要番個。」
呢間八卦媒體仲曝光莎雲娜疑似孕照，只見莎雲娜身材略微發胖，小腹喺鬆身衫下明顯隆起。從身材同打扮嚟睇，莎雲娜再「有餡」嘅機會相當高。據佢哋身邊嘅朋友仲講，「大帝」兩公婆都信今次會生女。
另外，《福布斯》雜誌日前公布NBA球星代言費嘅前10位，勒邦占士以4,200萬美元（約3.25億港元）高踞榜首，高比拜仁則以3,400萬美元（約2.64億港元）排第二，第三位嘅戴歷羅斯（Derrick Rose）雖然冇打波但仍能得到2,100萬美元（約1.63億港元）代言收入，而第四名杜蘭特（Kevin Durant）嘅1,400萬美元（約1.09億港元）只係占士嘅三分一，可見「大帝」吸金威力驚人。
而NBA嘅代言費頭10位總和達1.55億美元（約12億港元），呢個價錢比全美其餘３大職業聯盟前十位嘅總和仲要多。全國美式足球聯盟（NFL）前十位總計只有5,500萬美元（約4.27億港元），美國職棒大聯盟（MLB）亦得3,000萬美元（約2.33億港元），至於北美冰球聯賽（NHL）就最奀，前十位代言費總計只得1,500萬美元（約1.16億港元）。