組隊打波 麻甩的浪漫
近年運動確實喺香港普及咗好多，除咗一年一度嘅渣打馬拉松，其實香港一年都有接近十幾二十個跑步比賽，仲有近幾年開始流行嘅不同類型業餘籃球聯賽，都令香港人個個變成運動員，畀機會自己做吓運動，不過最重要係可以同一班老友再續未了緣。
依家聯賽好鬼Pro
比較有名，較易接觸嘅兩個聯賽係叫e-league同埋博亞，又咁啱我兩個聯賽都有參加，發現依家真係搵食艱難，為咗吸引隊伍報名各出奇謀，以前冇乜競爭時可能只有獎牌獎盃，依家又有攝影師，又有即場數據，又有「鴨屎」（apps)，睇到以為自己打緊甲一添！我覺得科技令人進步，全民運動開始普及化，令一班想運動又想比賽嘅人有咗目標，玩都玩得有意義嘛！可以鍛煉身體又可以乘機敍舊，再講，又有NBA一般嘅數據分析，你想做史堤芬居里？定係杜蘭特？不如打完波之後print埋份數據，攞去南華、福建、永倫等見工，可能有驚喜呢！
男人的浪漫，除咗食火腩飯，其實組隊打波踢波係唔錯嘅節目，我哋呢啲踏入中年，個個都為生活忙碌，除咗喺面書update好友近況之外，真係好難約埋成班佬出嚟食飯見面，唔係返工OT，就係返寢宮服侍太后娘娘，生活變得單調，所以有時做運動一齊郁吓玩吓，回到少年十五十六時，真係好開心！打波為名，聯誼為實，男人啲嘢，你明o架啦！
鍾國樑（Alex）
天生運動狂，前亞運游泳香港隊「水霸王」