「波神」再做老竇儲夠一隊波！米高佐敦（Michael Jordan）去年4月同伊維狄（Yvette Prieto）結婚，呢位古巴籍索模喺美國時間9號於佛羅里達州誕下孖女Victoria及Ysabel，令下周一51歲大壽嘅佐敦開心到爆。
舊年12月底「波神」已向傳媒證實佗孖女，而伊維狄的勁爆「谷奶照」亦不斷喺網上瘋傳。「波神」發言人Estee Portnoy尋日向傳媒報喜，宣布伊維狄順利生咗孖女。
好多人都話「囡囡係爸爸前世嘅情人」，就喺情人節前球神再添兩名千金，肯定Sweet到爆，而一對孖女亦喺波神最窩心嘅生日禮物。Estee發聲明話：「伊維狄與兩個BB女Victoria、Ysabel身體狀況好好，佐敦一家人對於小生命降臨好興奮。」
山貓班主佐敦本身已經有2仔1女，包括謝菲佐敦（24歲）、馬庫斯佐敦（22歲）及Jasmine（19歲），如今加上呢對孖女，啱啱夠5個可以組一隊籃球隊，有美國傳媒更笑話WNBA（美國女子職業籃球賽）未來將會擁有兩位「女波神」。
另外，被譽為「波神接班人」嘅勒邦占士（LeBron James）口出狂言！尋日接受《NBA TV》訪問時就自封為史上5位最偉大籃球員之一，媲美佐敦、「小鳥」布特（Larry Bird）、「魔術手」莊遜（Earvin Johnson）及「大O」奧斯卡羅拔臣（Oscar Robertson），完全冇將「天勾」渣巴（Kareem Abdul Jabbar）及張伯倫（Wilt Chamberlain）等名宿放喺眼內。呢位熱火球星尋日攻入全場最高37分，帶領球隊以103比97贏太陽，又確實抵「大帝」囂張。