新春願望講呢啲

波子王歐陽若曦 贏咗個假期 陪老婆遊越南

儘管生於溫哥華，自小在加國成長，連中文字都「認唔到幾多隻」，不過歐陽若曦十分重視中國農曆新年，長期「周圍飛」鍊車嘅佢，適逢近日冇比賽，把握機會同愛妻享受二人世界，年初二會去越南旅行，「叉足電」迎接新賽季嘅連場大戰，以及搞好自己舉辦的小型賽車訓練計劃。中國人最講意頭，新年祈福離不開個「贏」字，Darryl亦唔例外，11及12年農曆年佢都贏得澳洲Bathurst 12小時耐力賽冠軍，令佢好難忘：「其實今個新年我都『贏』咗一個假期，有較多時間同家人共處，又可陪太太旅遊，希望3月開季後能繼續贏更多冠軍。」

除落場鬥車，Darryl另一個大Project就是3月再辦「明日之星」小型賽車培訓班：「呢個計劃我投放咗好多心血，係為9至16歲小朋友而設，目的令參加者學習正規賽車理論、態度，同時讓家長一同體驗。」

曹星如

劉子健

新春願望：贏世界級賽事

除我個「明日之星」培訓班愈辦愈好外，今年我會參加好多比賽，3月就要開始試車，4月到英國參加首項賽事，雖然尚未定下全年賽程，不過無論主力房車賽還是耐力賽，都會希望可以贏番隻世界級賽事獎盃。

神拳小子曹星如 為夢想犧牲 留菲律賓苦練

新春慶團圓，不過未必人人有假放，正如去年寫下11戰連續不敗神話，人氣爆紅嘅「神拳小子」曹星如就冇得偷懶，要隻身在菲律賓練拳中度歲，備戰2月22日澳門嘅「皇金爭霸戰」，向衝出亞洲之途邁進，Rex揚言希望兩年內可踏上「賭城」拉斯維加斯擂台，實現終極拳擊夢！」

曹星如近期一直逗留馬尼拉集訓，周一專程回港出席拳賽宣傳活動，當天更抽空為本報拍攝賀年特輯，雖然還要大開金口獻唱《財神到》，但對於愛聽音樂、至Like陳奕迅的他來說毫無難度，幾乎一Take過搞掂。翌日已返菲島的Rex透露，連續兩年都會無法留港過年：「要練拳，冇計！菲律賓拳館一個華人都冇，新年係『零氣氛』，亦食唔到最愛嘅年糕，惟有食雞當開年餸，不過比賽臨近要控制體重，唔可以大魚大肉，等打完場拳先至『擦餐勁』補數吧！」

新春願望：踏足賭城擂台

我有4個願望，一係自己和身邊所有人都身體健康，二係有更多機會喺香港比賽，推動拳擊運動；三係挑戰世界，透過參加國際賽提升實力；最後終極夢想就係企上拉斯維加斯擂台，證明「香港拳手都得嘅」！

型籃射手劉子健 拜年有晒部署 度定路線圖

新年流流、人人都會忙住拜年，不過効力南華籃球隊嘅「靚仔射手」劉子健卻要在操練中過節，皆因球隊正全力備戰年初八嗰場工商盃決賽！今年只得年初一至三係私人時間，到年初四便要復操，但劉子健卻直言好享受：「對我嚟講，新年係一個與親戚見面嘅難得機會，香港雖然地方細，但有時想聚一聚都未必咁容易，所以好珍惜呢啲機會！今年只有3日時間畀我去拜年，所以要一早計劃好『路線圖』，以爭取時間拜多啲年。」

談及拜年難忘經歷，劉子健好雀躍咁話：「最難忘嗰次應該係讀小學嗰陣，同家人第一次返廣州過新年、第一次燒炮仗，仲記得玩炮仗時，開始時是好驚爆親自己，但玩多幾次之後就上咗癮，之後更試過將炮仗埋喺牛糞度引爆，結果當然是爆牛糞四散，非常頂癮，依家諗番起，都好想再返內地過新年！」

新春願望：擸晒所有獎盃

自己年紀唔輕，要認真對待每個爭標機會，況且新年期間可與一班戰友齊齊度過，一樣好有「家庭溫暖」，除咗工商盃外，今年我嘅目標仲有銀牌、甲一常規賽同 季後賽錦標，希望可以咁將啲冠軍獎盃捧晒返南華啦！

劍界潮人張小倫 難得留港度歲 梗要食好嘢

「財神到，財神到，好心得好報；財神話，財神話，揾錢依正路......」身高1米88，有型有款，張小倫「劍神」變「財神」台型十足，拍攝當日，呢位「玩得之人」一見到成套財神服飾即大呼「過癮」，還笑說希望為他帶來好運，實現打入世界Top 16及亞運奪金嘅目標。

蛇年過後，「小倫」又要展開「空中飛人」生活，四出集訓比賽，還好劍擊是歐洲主流運動，故他每年總有好幾轉「歐遊」，實在令人羨慕！不久前才隨隊再訪巴黎的「劍神」說：「運動員經常要東奔西跑，過年過節往往都身在異鄉，記得有年在西班牙竟可以食到中式團年飯，感覺勁Warm！今年難得留港度歲，當然要把握機會同家人朋友歡聚，日日『食好嘢』啦！」識食識歎嘅「小倫」還推介過年必吃客家菜：「阿媽煮嘅釀苦瓜同秘製鴨，次次都食到停唔到口。」

新春願望：仁川亞運衝金

上屆亞運決賽以1劍之差僅負雷聲，到依家仲「赤赤痛」，經過3年多磨練，自覺進步和成熟咗好多，今屆當然想一嘗金牌滋味，不僅在個人賽更上層樓，亦盼團體賽有所突破，此外我希望今年內闖入世界前16 （目前排24）！

圖／文：Maggie、司徒子文