歷克楊格球場內外一樣惹火

湖人射手歷克楊格(Nick Young)近來同澳洲歌手女友Iggy Azalea打得火熱,後者日前更將兩人床照上載到社交網站大晒恩愛。歷克楊格場外春風得意,點知落到球場就失晒分寸,昨日面對太陽時竟失控與對手「開拖」,結果被逐離場,累湖人作客不敵對手遭逢六連敗,賽後更埋怨隊友唔幫拖,搞到自己要「一揪五」!

床照曝光後「一揪五」被逐

Iggy Azalea日前在個人Instagram上載與歷克楊格的床照,其後接受訪問更稱因男友而愛上籃球。未知歷克楊格近期是否被愛情沖昏頭腦,昨日對太陽時第二節一次快攻被對手新秀阿歷士蘭恩(Alex Len)惡意犯規後竟然失控,先後與對方球員互相推撞,結果球證將兩人驅逐離場,而湖人最終作客以114比121不敵對手。

歷克楊格賽後除指摘對手外,亦埋怨隊友對事件坐視不理:「最嬲係當時情況好似一揪五咁,如果有人嚟阻止我,就唔會搞到件事咁僵囉!」歷克楊格的火爆行為或會惹來聯盟秋後算賬,對傷兵滿營的湖人來說實在係雪上加霜。湖人明日將作客塞爾特人,綠軍球星朗度(Rajon Rondo)有可能在這場褪色大戰復出。(周六早上8時30分開賽)另外,火箭憑占士夏登(James Harden)射入關鍵球,於全場貢獻26分下作客以103比100後來居上險勝塘鵝取得三連勝。