NBA衞冕隊伍熱火昨晨為比士利（Michael Beasley）慶祝25歲生日，一眾戰將狂歡到凌晨1點先散場，可能玩得太癲搞到個個腳仔軟晒，昨日造訪紐約人表現大走樣，其中「閃電俠」韋迪（Dwyane Wade）更罕有地六個罰球全部炒晒，連累熱火最終以92比102不敵紐約人，三連勝走勢斷纜。
大部分熱火球員都有出席比士利的生日派對，其中「大帝」勒邦占士（LeBron James）更攜同妻子莎雲娜（Savannah Brinson）到場，認真畀足面。奈何太過盡興，熱火昨仗表現失準，攻入32分的「大帝」亦錄得6次失誤，第二節更被紐約人球星安東尼（Carmelo Anthony）「成份爆開」表演雙手入樽。相反，紐約人昨仗全隊命中率高達54%，最後以10分差距大炒熱火，取得今季首次三連勝。
六次上罰球線結果全炒的韋迪，賽後拒絕為輸波而「孭鑊」：「我又唔係射失20球，射失6球都唔係咁差啫！」另外，紐約人射手JR史密夫（JR Smith）因早前「鞋帶門」風波而被罰款5萬美元（約39萬港元），今仗更被主帥活臣（Mike Woodson）放入雪櫃，盛傳隨時被球會踢走。