女友嫌冇Feel雷神被飛
雷霆「得分王」杜蘭特（Kevin Durant）上年7月同女朋友Monica Wright高調訂婚，呢對籃壇模範情侶一向喺人前都Sweet到爆，球迷亦非常期待見到佢兩個正式拉埋天窗嘅日子。點知「雷神」杜蘭特最近就喺Monica嘅instagram裏面消失得無影無蹤，呢位籃壇女將近期嘅自拍中更冇戴上訂婚戒指，再加上Monica留言講到明冇晒feel，莫非佢哋兩位臨門「撻Q」結唔成婚？
杜蘭特同女友Monica自上年公開戀情後，就極速喺7月宣佈訂婚，「雷神」更不時會出現未婚妻instagram之內，但自從9月起就「銷聲匿迹」，惹嚟外界猜測佢哋兩個正處於冷靜期。Monica Wright日前將自拍照上載到社交網站，拎着手機嘅左手都係唔見婚戒蹤影，之後她仲留言講到明：「我夠膽講，有啲嘢已經唔再一樣，因為我已經冇晒感覺啦！」此番言論更加令人懷疑，杜蘭特與Monica其實已經分咗手。
情場失意 波場都唔掂
至於另一當事人杜蘭特就懶理分手傳聞，尋日喺雷霆作客爵士一仗如常上陣，雖然佢狂轟全場最高48分，但手感只係麻麻，外圍命中率更低到得兩成，無法阻止球隊以101比112輸波。雷霆聽朝將作客對金塊，相信球隊上下都想贏波一吐烏氣。
（now 635周五早上11時30分直播）
另據NBA官網報道，公牛尋日宣布將新兵拜林（Andrew Bynum）放棄，預計可慳番大約2,000萬美元（約1.55億港元）薪酬空間，盛傳昨仗喺主場以107比88大炒塘鵝嘅熱火，同另一爭標分子快艇都對呢位「麻煩友」好有興趣。