柏臣斯淪輸波罪人
火箭球員柏臣斯（Chandler Parsons）早前為一個服裝品牌拍了一輯性感撩人的廣告，有記者隨後將柏臣斯廣告的照片帶給火箭球員「鑑賞」。點知一眾火箭隊友睇完唔知係咪畀廣告的大膽尺度嚇親，翌日作客東岸「一哥」溜馬時表現大失水準，以33分之差慘負對手，搞到柏臣斯無端端變成球隊輸波的罪魁禍首。
柏臣斯早前為某牛仔褲品牌拍攝廣告，風格完全係走性感大膽路線。柏臣斯於廣告中赤裸上身，和名模Ashley Sky貼身做出不少曖昧動作，他更於twitter為品牌作宣傳，上載一張自己與女模特兒激情依偎的照片。一位電視台女記者竟將這張照片印出來帶到火箭訓練場，讓柏臣斯及一眾隊友「鑑賞」。
侯活笑佢太開放
林書豪（Jermey Lin）看完後顯得有點尷尬，只說無可奉告；占士夏登（James Harden）則笑到彎腰，然後揉揉眼睛要求記者問其他問題。「超人」杜域侯活（Dwight Howard）則乘機嘲笑柏臣斯：「我哋都好單純，玩嘅都係小朋友玩意，但佢就會做其他嘢！」至於主角柏臣斯則解釋道：「呢度係Key West（佛州最南的海灘），一個好靚嘅地方，同我拍檔嘅係一個好靚嘅女Model。拍呢啲嘢硬係覺得有啲奇怪，但都幾得意嘅，呢個係好好嘅經歷！」
被溜馬大炒33分
火箭昨晨造訪東岸一哥溜馬，一眾隊友未知是否被柏臣斯意識大膽的廣告嚇親，全隊表現大失水準。當中「大鬍子」占士夏登全場14射3中只得12分，火箭全隊投射命中率更只有3成8，最終以81比114大敗於溜馬腳下。至於贏波的溜馬明早將於主場迎戰塞爾特人，有望再下一城。（周一早上7時開賽）