波神50有心有力
「波神」地位真係無人能及，米高佐敦（Michael Jordan）退役多年一樣備受各界關注！上月底宣布再做老竇的「波神」，昨日被美媒踢爆古巴籍老婆伊維狄（Yvette Prieto）「打孖嚟」佗孖女，計埋已育兩仔一女的「波神」，今鋪真係可以組隊籃球隊都得喎！米高佐敦旗下的山貓昨日亦爭口氣，主場以95比87擊敗帝王終止三連敗，「波神」今鋪飲得杯落囉！
年屆50歲的米高佐敦有心有力，今年4月與名模伊維狄拉埋天窗之後，上月底即刻宣布榮升老竇，而伊維狄的「谷奶巨肚」相早前亦於網上瘋傳。昨日有知情人士向美媒《TMZ》報料，話伊維狄已證實懷有雙胞孖女，可謂雙喜臨門。
佐敦本身已育有兩仔一女，不少球迷都戲言孖B出世後，「波神」可湊夠一支籃球隊。不過要做「波神傳人」絕不容易，「大公子」謝菲佐敦（Jeffrey Jordan）及「二公子」馬庫斯佐敦（Marcus Jordan）在大學籃球界均屬「二打六」，明顯不是打波材料。慶幸佐敦旗下的山貓今季戰績有點起色，昨日就憑甘巴獲加（Kemba Walker）攻入全隊最高的24分，主場以95比87勇挫帝王終止三連敗頹勢，米高佐敦睇到肯定老懷安慰。
居里着火勇士擒塘鵝
另一邊廂，有伊古達拿（Andre Iguodala）傷愈復出的勇士，憑藉史堤芬居里（Stephen Curry）貢獻28分及12次助攻的「雙雙」成績，協助勇士主場以104比93擊敗塘鵝，為明早續於主場鬥馬刺注入強心針。（now 635周五早上11時30分直播）
本報綜合報道