木狼馬刺移師墨國吸金
NBA海外常規賽明早爆發，擁有大批外援嘅馬刺及木狼將移師墨西哥首都墨西哥城開戰，剛成為聯盟「最老雙20」球員嘅馬刺長青樹鄧肯（Tim Duncan）及木狼「拉丁風頭躉」列比奧（Ricky Rubio）同場較技「吸客」。兩支聯合國兵團喺墨西哥交鋒，為聯盟利益着想肯定打得精彩！
ＮＢＡ一直致力推動國際化，近年頻頻喺海外舉行季前賽甚至常規賽，藉此宣傳聯盟品牌吸納更多球迷。ＮＢＡ拉丁美洲副總裁莫治奧表示：「足球喺墨西哥嘅地位無可取代，但ＮＢＡ有能力成為呢度嘅第二大運動。」今次是繼1997年火箭鬥小牛後，ＮＢＡ第二次喺墨國舉行常規賽，聯盟亦刻意挑選加埋有成17個非美國球員在陣嘅馬刺及木狼交手，打正全球化旗號。
95％波飛賣出 僅遜拳王大戰
鄰近墨西哥的木狼今次雖被屈「主場」出擊，不過難得有機會吸納新Fans，當然無怨言，加上陣中擁有拉丁語系嘅「萬人迷」列比奧及巴利亞（J.J.Barea），單計人氣已經唔輸蝕。事實上截至前日為止，可容納2.1萬人嘅墨西哥球場已賣出95％波飛，僅次於2012年墨西哥拳王馬奎斯火併費真高嘅大戰，創下當地入場人數第二高體育活動紀錄。
馬刺尋日就憑鄧肯貢獻23分及21個籃板球，兼且喺完場前絕殺得手，主場以102比100險勝鷹隊，「石佛」更以37歲零221日之齡創下ＮＢＡ史上「最老雙20球員」。鄧肯明早將聯同柏加（Tony Parker）及真路比利（Manu Ginobili）硬撼木狼雙星列比奧及「籃板王」路夫（Kevin Love），今趟實有好戲睇！
（周四早上10時30分開賽）