熱火昨晨以107比92輕取太陽，韋迪（Dwyane Wade）貢獻21分及12次助攻。韋迪賽後high爆，喺勒邦占士（LeBron James）接受訪問時於場邊表演「空翻」，引來現場一片歡呼成功「搶鏡」。
公牛主將戴歷羅斯（Derrick Rose）尋日朝早完成右膝蓋半月板手術，戴歷羅斯做完手術後仲同護士合照，睇落心情似乎唔錯，但佢肯定會缺陣今季餘下嘅所有賽事。缺少戴歷羅斯嘅公牛就繼續沉淪，尋日作客加時以83比89不敵爵士遭逢四連敗。
火箭尋日作客以93比86擊敗灰熊取得兩連勝，林書豪（Jeremy Lin）今場正選上陣攞到14分，全部都係靠個人突破直接或間接得分，雖然全場只有八次投射，不過每次出手都盡展其籃球智慧。
勇士日前作客拓荒者嘅第三節出現球員大打出手嘅情況，NBA聯盟尋日正式宣布，勇士中鋒波格特（Andrew Bogut）同拓荒者後衞莫威廉士（Mo Williams）由於「講手」雙雙被罰停賽一場，另外仲有三個球員亦被罰款。