莫他拿大逆轉封王
「呢一場將會係我職業生涯永遠唔會忘記嘅賽事。」澳門大賽車新濠天地GT盃得主莫他拿，昨日勇奪佢五年內東望洋跑道第六個冠軍，這名有「澳門先生」之稱嘅車手，利用超卓技術及膽識，雖然喺十二個圈賽事中，賽到第九圈只排第四，但憑住唔放棄嘅精神，最終後上奪冠，絕對係製造咗一場經典。
最後四圈發力瘋狂過車
莫他拿本來緊隨英國車手晏高排第二出戰，但起跑冇耐即被瑞士裔香港車手恩培尼多利爬頭，去到嘉思欄彎又因新西蘭車手班博嘅意外影響跌落第四。不過莫他拿喺最後四個圈盡顯功架，先於第九圈因為頭車晏高上岸，由第四升到上第三，接住一個圈佢再藝高人膽大，響山頂醫院附近極窄賽道搶上第二，直逼領先嘅恩培尼多利。
去到倒數第二個圈，恩培尼多利被落後一圈嘅戰車影響而要收慢，莫他拿同當時排第三嘅屈斯把握機會，一齊超越恩培尼多利，直踩至終點，完成五年六冠偉業。
恩培尼多利無辜失冠
莫他拿賽後表示，當自己跌落第四時，真係無諗過攞到冠軍，但當機會真係出現，就連續「幸運、幸運同幸運嘅爬頭」，並表示今場勝利一世都唔會忘記。至於本來好有機會奪冠嘅恩培尼多利就抱怨，當時賽道工作人員已經示意慢車要讓佢過頭，但呢班車手阻住自己，令莫他拿同屈斯「超車」，勞氣話大會唔應該再畀呢啲車手參賽。
至於同樣駕駛奧迪R8出戰GT盃嘅李英健亦得到好成績，佢由第11位起步，追到上第四過終點，Marchy對自己表現滿意，尤其今次嚟到澳門先用一個新廠車，明年會將目標放係奧迪盃，而澳門大賽車GT盃亦有機會捲土重來。