林恩弗爆搶佔頭位
澳門格蘭披治賽車重頭戲，三級方程式大賽今日壓軸登場。德利車隊嘅英國車手林恩喺尋日選拔賽表現大勇，由第三位飆上首位，今日將排頭位出戰，瑞典嘅羅辛基斯排第二位，選拔賽排頭位嘅意大利車手馬些路跌落第三，三人係今年歐洲三級方程式錦標賽三甲分子，由歐洲鬥到澳門，上屆冠軍達哥斯達只能喺第四起步，衞冕之路極難行。（無綫翡翠台今早10時30分及下午1時15分直播賽事）
尋日F3舉行十圈選拔賽，排第三出賽嘅林恩迅速發動攻勢，進入葡京彎前已領先，可惜佢走線失誤，被同樣超越頭車嘅羅辛基斯過頭。不過，由於起步時有其他車手發生意外，第二圈開始前要出動安全車，比賽重開，林恩又喺葡京彎發難成功爬頭，並且連續造出幾個快圈速，最終輕鬆取勝，今日正賽將以頭位出賽。林恩賽後表示，戰車狀態好好，起步做得唔錯，但佢強調正賽係另一回事，唔會掉以輕心。
達哥斯達排第4難衞冕
馬些路、羅辛基斯同林恩三人分別係今季歐洲F3錦標賽總冠、亞、季軍，三雄將戰場移至東望洋，今日一戰肯定超級精彩。
爭取衞冕澳門F3嘅葡萄牙車手達哥斯達，尋日選拔賽只得梗頸四，但佢揚言要喺今日收復失地，並爭取明年繼續留在紅牛青年隊，追尋F1夢。
紅牛二隊上月選定明年F1車手人選，達哥斯達名落孫山後重返澳門衞冕F3，但佢尋日話：「既然今年錯失F1機會，惟有明年繼續爭取吧。」
周兆年、黃兆崑澳門直擊