仇偉冠重披戰衣好嚴肅
香港車迷熟悉嘅「仇師傅」仇偉冠，今年獲邀參戰慶祝澳門大賽車60周年嘅尚酷R中國大師挑戰賽，同一眾曾經揚威過東望洋賽道嘅車壇老將再鍊過。「仇師傅」仲帶埋囡囡Dionne嚟打氣，原來Dionne今年參選過港姐，佢話自己都好想落場鬥車，不過未攞到爸爸批出嘅License。
曾選港姐愛女到場打氣
「仇師傅」同傅厚澤、大久保等齊齊落場鬥車，同場仲有幾名前澳門三級方程式冠軍車手，「仇師傅」喺車壇多年，識落唔少朋友，通常有佢喺度都有講有笑，但尋日佢親自落場，就成個人變得嚴肅晒，一句話都唔講。相反，到場打氣嘅囡囡Dionne就有問必答，今年曾參選港姐嘅Dionne話，其實自己好有興趣鬥車，可惜「攞唔到爸爸批嘅License」，仲話依家都有「車壇楊怡」楊嘉怡呢啲女車手，爸爸唔應該擔心。
呢場中國大師挑戰賽尋日進行練習賽，暫時造出最快圈速嘅係2006年澳門F3冠軍英國車手康威，曾經亮相F1嘅大衞百拉咸排第六、「仇師傅」排二十，而第一代賭王傅老榕孫兒傅厚澤暫列十八。
今日賽程
7:30am 星河灣‧名門世家澳門格蘭披治電單車大賽–排位賽
8:30am FIA世界房車錦標賽–澳門東望洋大賽–星河灣‧名門世家特約–練習
9:20am 金光大道度假區蓮花大中華盃–排位賽
10:10am 太陽城集團澳門路車挑戰賽–排位賽
11:00am 星河灣‧名門世家澳門格蘭披治三級方程式大賽–練習
12:15pm FIA世界房車錦標賽–澳門東望洋大賽–星河灣‧名門世家特約–練習
13:05pm 尚酷R中國大師挑戰賽–排位賽
13:55pm 新濠天地澳門GT盃–排位賽
14:45pm 星河灣‧名門世家澳門格蘭披治三級方程式大賽–排位賽
15:35pm FIA世界房車錦標賽–澳門東望洋大賽–星河灣‧名門世家特約–排位賽