中國新星孫正瞄準F1
「做人冇夢想同條鹹魚有咩分別？」中國車手孫正喺車壇寂寂無聞，昨在第60屆澳門格蘭披治大賽車第二周賽事中嘅三級方程式排位賽更「包艇」衝線，不過自幼就因為遊樂場小型賽車挑起賽車癮嘅孫正，即使有個疊水工程師老竇仍然拒絕做無能「富二代」，堅決要以殺入F1為終極目標，養起頭家做一家之主。
第60屆澳門格蘭披治大賽車經過上周嘅支援賽後，昨日正式展開第二周賽事，「三大賽事」重頭戲三級方程式昨午進行排位賽，結果瑞典車手羅辛基斯、衞冕嘅達哥斯達及森斯包辦頭3位，來自中國嘅孫正包尾，不過就絲毫冇打擊呢位車手嘅自信。
在北京出世嘅孫正，13歲已開始參加內地巡迴賽事，去年更成為英國F3國際系列賽年度冠軍，自細就視賽車為生命嘅孫正，自爆係喺遊樂場建立對賽車嘅激情，呢位21歲車手表示：「我7歲在遊樂場玩小型賽車，愈玩愈上癮，家人又認為在賽車場鍊車比在街上鍊車安全得多，所以都非常支持我向賽車夢想進發。」
老竇係水立方總工程師
爸爸從事建築，並曾以總工程師身份參與水立方建築項目，本可印印腳做二世祖嘅孫正，坦言就算有個疊水老竇都唔會好食懶飛，未來目標最想躋身F1行列，賺錢供養即將退休嘅爸爸，孫正稱：「目前我希望在F3浸淫，以偶像達哥斯達及馬些路作奮鬥目標，未來當然想轉戰F1，雖然爸爸因公事繁忙，今次未能到場為我打氣，但我知道他會在家中收看電視直播，所以我更加不能辜負他對我的期望。」
黃兆崑、Billy澳門直擊