歐陽若曦「主場氣勢」爭佳績
一如往年，FIA世界房車錦標賽選擇澳門東望洋跑道作為謝幕戰，去年開始出戰呢個賽事嘅歐陽若曦，雖然喺獨立盃總成績只排第六，無緣入三甲，但佢經常強調，澳門比賽可謂「半個主場」，希望喺呢度有港澳嘅車迷打氣下，爭取到好成績。
FIA世界房車錦標賽總冠軍已經係法國車手伊雲梅拿嘅囊中物，因為佢已經拋離第二位意大利嘅泰基尼162分，即使伊雲梅拿一分都冇，而泰基尼納晒今站嘅55分都冇用。
戰車唔夠快 技術搭夠
至於獨立盃方面，香港車手歐陽若曦會同場出戰，雖然佢只得59分排第六，但由於上屆佢喺東望洋賽道兩個回合都成為獨立盃分站冠軍，Darryl希望可再度揚威，至於今年改揸寶馬喺直路時唔夠雪佛龍快，佢會用技術搭夠，盡量爭取佳績。