祖高域食尾胡再衝台維斯盃
塞爾維亞球星祖高域昨盡顯「室內賽之王」威力，以直落兩盤6比3、6比4搞掂西班牙宿敵拿度，蟬聯ATP年終賽，繼2008及2012年後第3次食出「尾胡」，「扮嘢祖」賽後向拿度下戰書，豪言明年不僅要衝擊大滿貫錦標，更要搶番世界「一哥」地位。
今次係雙方歷來第39次巔峰對決，儘管之前拿度獲22勝16負較佳對賽往績，但佢喺自己最唔擅長嘅室內硬地場顯得一籌莫展，反觀近態Fit爆嘅祖高域愈打愈有，最終挾22連勝強勢捧盃。自9月美網決賽不敵拿度後橫掃中國公開賽、上海大師賽、巴黎大師賽及ATP年終賽，今季累積7座單打桂冠，戰績72勝9負，僅次拿度的10個冠軍及75勝7負。
豪言搶番一哥位
祖高域賽後心情爆靚，向出席記招嘅傳媒送上朱古力，佢話22連勝係自己職業生涯第2偉大戰績。明年最大目標係再贏大滿貫獎盃，一月衞冕澳網當然係首要任務，其次係爭回世界第一。
「扮嘢祖」結束倫敦之行即要趕返塞爾維亞，準備本周五領軍台維斯盃世界組決賽迎擊捷克，力爭重奪王座為2013年劃上完美句號，之後再遠赴南美進行多場表演賽。