雷霆當家控衞韋斯布克（Russell Westbrook）不嬲都係潮人，據美傳媒《TMZ》透露，佢最近獲六位數字酬勞成為內褲品牌Kings and Jaxs嘅代言人，遲啲仲會落手落腳幫品牌設計埋底褲添，認真犀利！
路易斯威爾大學球星奇雲韋爾（Kevin Ware）去季恐怖斷腳而提早收咧嘅一幕，相信大家仲記得。這位後衞上星期閃電康復重返賽場，佢尋日向《ESPN》透露，原來同正在養傷嘅湖人球星高比拜仁（Kobe Bryant打賭，較遲復出嗰位就要到場睇對方嘅比賽，「小飛俠」盛傳明年2月先復出，今次梗係輸咗啦，睇嚟都要快啲Book定機票！