保羅佐治黑妹論遭圍插
新鮮出爐嘅東岸每周最佳球員、溜馬當家球星保羅佐治（Paul George）強勢沒法擋，尋日領軍喺主場以95比79殺退灰熊，帶領呢支東岸球隊成為NBA史上第18支開季8連捷球隊。不過，保羅佐治可能High過頭，竟公然踩黑人女性，間接踩埋阿媽！
未計尋日賽事，保羅佐治上周每場平均錄得24.8分、7.5個籃板球、3.8次助攻及1.75次偷波，職業生涯第2次榮膺東岸每周最佳球員。呢位去季「最佳進步球員」尋日延續強勢，係第四節頭一分鐘內連攞6分，成功將賽事「擺入雪櫃」，仲攻入全場最高嘅23分，帶領溜馬以16分之差大炒灰熊，開季8戰全勝。
開季戰績威過威士忌，人氣急升嘅保羅佐治可能High過頭，竟然公然歧視黑人女性！
「只愛白色女性」
近日據美國傳媒《MediaTakeOut》透露，一位疑似保羅佐治女友的靚女Stephanie，喺twitter上載與保羅佐治一張親密照後，呢名溜馬球星除咗留言表示「我只愛白色女性」之餘，仲以帶歧視字眼嘅「Black Chicks（黑妹）」嚟形容黑人女性，隨即惹嚟球迷口誅筆伐，指保羅佐治一啲都唔尊重自己嘅母親及祖母，相信呢位溜馬當家球星返屋企隨時要扭耳仔認錯！
另外，快艇憑「孖寶」格芬（Blake Griffin）及基斯保羅（Chris Paul）齊齊貢獻「雙雙」，喺主場以109比107險勝木狼，為明早主場撼雷霆一仗壯聲威。
（now 635周四早上11時30分直播）