NBA2013-2014常規賽明早揭幕，被譽為開鑼日「最強戲碼」一仗由衞冕的熱火主場惡鬥公牛，公牛Icon戴歷羅斯（Derrick Rose）結束18個月零1日的等待，強勢歸位。其實羅斯自踏足NBA之後一直被「大帝」勒邦占士（LeBron James）騎住，就連電子遊戲《NBA2K14》封面都被「大帝」搶埋，好勝心強的「牛魔王」於康復期間狂練遠程炮及彈跳力，誓要向占士下戰書，於「MVP大激鬥」攞頭彩！
占士過去5個球季共掃走4次常規賽最有價值球員，剩餘1次就由羅斯奪得。眼看公牛於上季次圈季後賽被熱火大炒4比1，《NBA2K14》封面又被「大帝」搶埋，羅斯當然不是味兒。這位2011年MVP克服左膝十字韌帶重創，季前垂直跳躍不單止高過昔日5吋，就連3分球命中率都大大提升，連公牛後衞馬基斯泰古爾（Marquis Teague）亦激讚：「由於剛剛康復羅斯唔可以做太劇烈嘅動作，佢開頭都只係練吓遠射，不過佢就射上癮，命中率仲提升唔少添，不嬲剷籃好掂嘅佢如果連3分都有埋，咁真係冇得嘜！」
據《華爾街日報》統計，自03年起20位試過韌帶撕裂的26歲以下球員，16至23英尺命中率平均提升4%，羅斯於季前賽貢獻場均20.7分，3分命中率更高達44.4%，比生涯的31.2%高出超過1成。
熱火前鋒保殊（Chris Bosh）坦言已做足功課研究「牛魔王」，韋迪（Dwyane Wade）亦預期今戰肯定惡啃，王牌占士則對今場波保持平常心：「我嘅狀態已經接近十足，今季熱火首要目標係衝三連霸，有比士利（Michael Beasley）同奧登（Greg Oden）兩位高質生力軍加盟，相信熱火嘅戰鬥力足以同任何球隊抗衡。」