灰熊班主單挑波神
「波神」米高佐敦（Michael Jordan）復出傳聞愈吹愈熱，就連灰熊的波癡老闆佩拉（Robert Pera）都「等唔切」，決定用慈善擺「波神」上枱引佢出山，揚言只要該名山貓班主接受「One On One」挑戰，就即刻捐100萬美元（約775萬港元）畀一間兒童醫院。
佐敦應約即捐百萬美元
球評家積倫羅斯（Jalen Rose）出名收風勁，去季就率先爆出占士夏登（James Harden）會被雷霆交易。他上星期接受網站Grantland訪問時，指米高佐敦今季會以50歲高齡再戰籃壇，為旗下山貓出戰一場常規賽，藉此谷行該隊入座率及波衫銷量。
35歲的佩拉出名係波癡，上月已經試過籌辦慈善活動，以One On One形式挑戰麾下球員東尼阿倫（Tony Allen）。對於傳媒要求單挑小牛老闆古班（Mark Cuban），佩拉決定打蛇隨棍上，日前透過twitter向佐敦下戰書：「如果大家想睇班主大戰，咁不如由我嚟單挑MJ（米高佐敦）！佢肯應戰我即刻捐100萬美元。」
佩拉並非得個「吹」字，《紐約每日新聞》上載一條短片，見到佩拉近期於灰熊教練指導下苦練球技，投籃、剷籃、帶波過人瓣瓣有板有眼。至於NBA季前賽，明早將上演一場熱火造訪籃網的星級大戰。
（now 678周五早上8時直播）