海登效偶像高比不言敗

征戰車壇10載,06年Moto GP冠軍海登(Nicky Hayden)風光過,奈何近年表現漸走下坡,睇見新一代車手馬昆斯、羅倫素甚至同輩的羅斯站在Moto GP頂點,海登難免不是味兒。不過這位「鐵甲奇俠」就拒絕認低威,更以兩大NBA偶像高比拜仁(Kobe Bryant)及約翰禾爾(John Wall)作奮鬥目標,希望在今季餘下4站的Moto GP做番齣好戲,抬起頭向Ducati車隊道別!

貴為06年世界冠軍,海登今季1次頒獎台都未上過,昨日於馬來西亞站雪邦賽道排位賽更「包艇」衝線,難免令Ducati車迷失望。笑言職業生涯動手術次數多到「數唔清」的海登,卻未有以傷患作輸車藉口,昨日於雪邦賽車場接受本報訪問時,仍然「阿Q」地展望將來。

視高比拜人為偶像的海登表示:「湖人上季成績唔太好,高比拜仁又養緊傷,但我相信『小飛俠』會同我一樣,無論受過幾多次傷,都唔會咁易放棄。」今季結束後極可能離開Ducati車隊的海登,早前坦言「未有為車隊帶來太多榮耀」,故希望在未來4站賽事做到最好,對自己,車隊及車迷作個交代,不讓其Ducati生涯留有遺憾。

螞蟻哥頭位出戰雪邦賽道

而暫時帶頭的「螞蟻哥」馬昆斯則大顯親民,昨日於Repsol Honda車房門口面對大批Fans圍剿依然有求必應,不厭其煩為車迷簽名合照,賽道上他亦沒有令粉絲失望,昨午於排位賽以2分0.011秒衝線,力壓羅斯及古哲奴做「一哥」,今日排頭位於雪邦賽道出擊。

(now 670周日下午1時直播)

Billy馬來西亞直擊